ردت اكتب فرح يوم من الايام وجبت حنة عرس وشموع خليت
اجرجر بالقصيدة معاندة وياي كلش تعبتني ومنه مليت
بديت بمستهل مامقتنع بي وست ابيات بيت يقشمر ابيت
ومكيف رحت اقراهة للناس وكبل ما اقرة كلمة بعيني صديت
اباوع بالملامح ميتة الافراح وياعاقل يطش على الموتة جكليت
المنصة مراية تعكس حال جمهور ما انافق واصب النار عالزيت
شفت جمهور وجهة مغيم دموع صرت دمعة وعلى خدودة تبديت
انا شاعر حزن مختص بالهموم ومو من هاي الهموم محصل الصيت
اعجبك ما اريد اتناول الموت اخلي المفردة تنكط توابيت
واخلي البيت نفسة يهزة معناه يشك زيجة على روحة ويلطم البيت
ويهتفلي الدمع من اقرة على الضيم وتصفكلي الجكاير والبواكيت
كبل شعري ترف بس وي كبل راح وجنت اكتب غزل تاليهة كفيت
تبت مابعد اصيرن (روميو)النوب لان بارخص ثمن باعتني جوليت
